Trátase do primeiro proxecto de compensación de pegada hídrica certificado que leva a cabo en Galicia froito da colaboración público-privada, coa participación de Viaqua, Hijos de Rivera, o Concello de Betanzos e Act4water

Yago Lorenzo, director de +Positive; Nicolás Esmorís, director de Viaqua; Emiliano Barelli, director de sostibilidade de Hijos de Rivera; María Barral, alcaldesa de Betanzos; Desiré Marín, responsable de Act4Water
 

Hoxe, 20 de novembro, tivo lugar no escenario do museo de Estrela Galicia, a presentación do proxecto Humidal Viladesuso, impulsado por Viaqua, Hijos de Rivera, o Concello de Betanzos e Act4water para a mellora da calidade da auga e a biodiversidade do encoro de Cecebre.

En 2013, o encoro de Cecebre foi declarado como zona sensible, a cal se ve afectada pola alta demanda de auga para usos industriais e urbanos. Ademais, nos últimos anos o encoro sufriu diversos episodios de eutrofización (altos contidos de nitróxeno na auga) afectando á calidade da masa de auga. Estes problemas son derivados da presión que exerce a agricultura, a gandería e as augas residuais urbanas.

Neste contexto, Viaqua, Hijos de Rivera e o Concello de Betanzos, desenvolven o primeiro proxecto de colaboración público-privada para a compensación de pegada hídrica en Galicia, con certificado Water+ baixo o estándar Act4Water. Humidal Viladesuso ten como obxectivo contribuír á mellora da calidade da auga do encoro de Cecebre, principal fonte de subministración de auga á contorna urbana e industrial da Coruña, a través da aplicación de solucións baseadas na natureza, favorecendo o desenvolvemento da biodiversidade local e contribuíndo á adaptación ao cambio climático.

Natureza para protexer a auga e a biodiversidade O proxecto “Humidal Viladesuso” aborda de maneira innovadora a rexeneración dos recursos naturais. Co obxectivo de mellorar a calidade das augas urbanas e a biodiversidade local en torno ao encoro de Cecebre, o Concello de Betanzos facilitou o desenvolvemento deste proxecto de compensación de auga nunha das súas instalacións, no que se desenvolverán solucións baseadas na natureza, combinadas coas infraestruturas de depuración existentes na
actualidade. Para iso, Viaqua, deseñou e construirá nos próximos meses un humidal de depuración que se situará á saída da depuradora de Viladesuso e que complementará o tratamento actual. Este humidal artificial actuará como un filtro natural, eliminando compostos como nitróxeno e fósforo da auga que sae da depuradora actualmente. Esta solución permitirá mellorar a calidade da auga que se devolve ao medio, mantendo unha baixa pegada de carbono e mellorando a calidade da auga do encoro de Cecebre.

Durante a presentación do proxecto, a alcaldesa do Concello de Betanzos, María Barral, destacou que “Proxectos como este son unha realidade grazas á colaboración público-privada, da man de empresas como Viaqua, que permiten dar resposta aos retos locais a través de solucións innovadoras aplicadas ao ciclo urbano da auga, mellorando a eficiencia hídrica e impulsando a súa circularidade.”

Nicolás Esmorís, director executivo de Viaqua, compartiu o papel que xoga a empresa concesionaria en proxectos como este: “Detectamos as necesidades locais e traballamos para, máis alá de dar un servizo, contribuír á adaptación ao cambio climático, promovendo proxectos innovadores e despregando solucións baseadas na natureza que permitan dar resposta aos retos ambientais do territorio onde operamos”.

Impacto positivo certificado

O impacto xerado polo proxecto en Viladesuso mídese mediante Créditos de Auga Positiva (CAPs), unidade de medida do impacto positivo en auga. Isto faise a través do Act4water Estándar, un marco normativo rigoroso de compensación hídrica que promove proxectos de preservación e restauración dos recursos de auga doce.

Desiré Marín, responsable de Act4Water, explicou como “Segundo este estándar, cada CAP representa 1,000 m3 de pegada hídrica aforrada. Desta forma, a través do humidal artificial e a xeración de auga de mellor calidade para o encoro, Viaqua xerará 297 CAPs anuais, o que representa un volume de 297.000 m3 equivalentes de pegada de auga aforrada. O proxecto recibiu a certificación Water+, un selo de garantía europeo concedido por Act4water que demostra o impacto positivo do proxecto nos recursos hídricos, así como outros beneficios ambientais e sociais na contorna do encoro”.

Estrella Galicia, adquiriu estes CAPs para impulsar o proxecto á vez que aposta pola certificación da xeración de créditos de auga auditables para a creación do impacto positivo na natureza. "O proxecto busca equilibrar o uso da auga na produción de cervexa mediante créditos de compensación hídrica. A través desta iniciativa, Hijos de Rivera quere contribuír a minimizar o impacto ambiental da súa actividade a través de proxectos que repercutan positivamente na súa contorna”.

Neste sentido, Emiliano Barelli, director de Sostibilidade de Hijos de Rivera, destacaba na súa intervención a importancia de xuntar vontades entre o sector público e privado en favor de iniciativas como esta, que repercuten de forma directa e tanxible na calidade das augas do encoro de Cecebre, un espazo único que require da implicación de todos no seu coidado. A compañía mostra así unha vez máis o seu compromiso coa xeración de impacto positivo na contorna.