Viaqua impulsa solucións innovadoras baseadas na natureza para preservar o medio ambiente 

A acción humana provocou que a natureza se atope nunha batalla constante contra unha especie invasora e perigosa: o plástico. Unha ameaza global que se arrastra polos nosos ríos, mares e océanos, contamina os nosos chans e asfixia a vida silvestre.  Toneladas de refugallos plásticos acumúlanse nos nosos ecosistemas, causando danos irreparables. É un recordatorio constante da forma en que as nosas prácticas insostibles de consumo e xestión de residuos afectan negativamente ao planeta.

Cada 5 de xuño celebramos o Día Mundial do Medio Ambiente e este ano, Nacións Unidas, chama a loitar contra este desafío que prexudica a nosa saúde e biodiversidade. Cada ano, prodúcense no mundo máis de 400 millóns de toneladas de plástico, e o preocupante é que a metade son dun só uso. Lamentablemente, menos do 10% destes plásticos recíclase, o que agrava aínda máis a situación. Como resultado, estímase que entre 19 e 23 toneladas de plástico contaminan os nosos ríos, lagos e mares, xerando un impacto negativo nos ecosistemas acuáticos.

Ante esta situación, a clave é protexer os ecosistemas e implantar novas prácticas máis respectuosas coa natureza. Viaqua, empresa galega con máis de 50 anos de experiencia na xestión ambiental, promove o desenvolvemento de infraestruturas verdes, baseadas na natureza, para preservar a biodiversidade e adaptarse aos efectos do cambio climático a través de tres compromisos: conservación e mellora da biodiversidade en espazos sensibles, eliminación do uso de pesticidas e fitosanitarios e loita contra as especies exóticas invasoras.

INFRAESTRUTURAS VERDES

Apostamos por restablecer as funcións ecolóxicas das instalacións da auga e favorecer a biodiversidade local nas contornas onde operamos. Con esta finalidade, realizamos diagnósticos de biodiversidade nas plantas de tratamento de auga co fin de implementar plans de acción. 

Entre as accións levadas a cabo atópase a eliminación de fitosanitarios e pesticidas. O 100% das nosas instalacións están libres destes compostos que son unha grave ameaza para a biodiversidade pola súa alta toxicidade, ademais de ser unha das principais causas da perda de insectos polinizadores.  En Viaqua promovemos un cambio de modelo de xestión das zonas verdes, utilizando alternativas como a aplicación de produtos ecolóxicos non tóxicos, a xestión diferenciada en espazos nos que se deixa a vexetación espontánea  e a potenciación de vexetación autóctona.

Nesta liña, o 100% das nosas instalacións contan con protocolos de actuación fronte ás especies exóticas invasoras, unha das principais causas da perda de biodiversidade. Para frealas, creamos e desenvolvemos un programa para a xestión de especies de flora invasora, BiObserva STOP-invasoras, unha ferramenta que permite a identificación, mapeo, avaliación do risco e desenvolvemento de plans de control e seguimento.

Para lograr os nosos obxectivos, é fundamental a colaboración do noso persoal. Grazas ao seu compromiso, impulsamos por sexto ano consecutivo o programa BiObserva Voluntariado, dirixido a preservar a biodiversidade nas nosas instalacións. Un proxecto no que o voluntariado de Viaqua reporta as observacións de aves durante a súa xornada laboral co obxectivo de coñecer a biodiversidade nas instalacións e poder deseñar plans de mellora. 

BIOFACTORÍA E RESIDUO CERO

Unha biofactoría é un novo modelo de instalación que promovemos desde Viaqua, baseado nos principios da economía circular, onde se xeran enerxías renovables, rexenérase  auga para a súa posterior reutilización e transfórmanse os residuos en recursos. 

Ademais de conseguir a circularidade total en canto a auga, enerxía e residuos, as biofactorías caracterízanse por unha integración na contorna natural, de forma que se minimiza o impacto en ocupación do chan, potenciando os servizos ecosistémicos nese espazo ocupado e transformando a infraestrutura gris nunha infraestrutura verde. 

Doutra banda, xérase un impacto social positivo a través do valor compartido coas comunidades locais, o diálogo e a colaboración cos grupos de interese e a sensibilización ambiental. 

Un exemplo desta transición cara a unha economía circular é a Biofactoría Norte (EDAR de Ourense), un proceso de transformación xunto ao Concello de Ourense onde a innovación sostible é a clave para lograr este cambio de modelo. Este proceso propiciou o despregamento de iniciativas en cada un dos eixos estratéxicos (auga, enerxía, recursos e contorna), tales como a reutilización dunha parte da auga depurada para rega e baldeo das instalacións, a coxeración de enerxía, a procura de novas vías de valorización de residuos e a integración coa súa contorna ambiental. 

Un referente nacional e internacional que captou fondos europeos para desenvolver nas súas instalacións iniciativas como o centro mixto de investigación CIGAT Circular,  froito da colaboración entre Viaqua e Cetaqua Galicia xunto coa Axencia Galega de Innovación (GAIN). A través de CIGAT Circular proponse un modelo integral para converter os residuos de orixe industrial, urbano, agrícola e rural en recursos de alto valor engadido coa fin de contribuír a que Galicia sexa unha rexión neutra en carbono.

SENSIBILIZACIÓN AMBIENTAL EN CLAVE DE ALIANZAS 

Convencidos de que para concienciar e achegar todo o traballo que realizamos cada día preservando a auga e o medio ambiente debemos sensibilizar á cidadanía para sumar esforzos xuntos e avanzar cara á sustentabilidade do planeta. Con esta fin desenvolvemos programas escolares, visitas a instalacións ou xornadas de voluntariado ambiental, entre outras iniciativas. 

Desenvolvemos o noso labor pedagóxico sobre o ciclo integral da auga a través de programas educativos como Aqualogía, chegando a escolares de toda Galicia para sensibilizalos sobre a importancia da auga e o medio ambiente, formar no coñecemento dos ciclos natural e urbano da auga, e profundar sobre temas de medio ambiente, como a importancia da auga, a sustentabilidade e o cambio climático.​

Á súa vez, organizamos xornadas de voluntariado cos nosos empregados como a limpeza do río Sarela ou a plantación do bosque Viaqua co obxectivo de unir esforzos para eliminar residuos das nosas paisaxes naturais, coidar da nosa contorna máis próxima e fomentar e preservar a biodiversidade que nos rodea. 

Desde Viaqua poñemos a innovación, a tecnoloxía e a sensibilización ao servizo da conservación do medio ambiente en Galicia, preservando a saúde do medio ambiente e combatendo a contaminación xunto a todos os axentes sociais. Está en xogo a saúde do planeta e a nosa.