Máis de 750 estudantes de colexios de primaria de Galicia participaron neste curso escolar no programa Aquae STEM, que dende hai cinco anos estimula as vocación científicas e tecnolóxicas entre as nenas. Viaqua e a súa fundación, Fundación Aquae, entregaron os recoñecementos aos centros educativos máis destacados, resaltando o papel fundamental do profesorado.

A directora Iria Vence, as alumnas Laia Vázquez e Chloe López, Ana Tejeiro, xerente de Viaqua e a concelleira de Educación do Concello de Ourense, Tamara Silva.

Durante os últimos cinco cursos académicos, máis de 6.000 alumnas de 2º a 6º de Primaria, de 80 colexios e sete comunidades autónomas, adentráronse nas especialidades científicas e coñeceron a destacadas profesionais femininas en disciplinas STEM (siglas en inglés de Ciencia, Tecnoloxía, Enxeñaría e Matemáticas) grazas ao programa educativo Aquae STEM.  

Viaqua e a súa fundación, Fundación Aquae, impulsan esta iniciativa en Galicia que ten como obxectivo promover o interese das mozas estudantes neste tipo de carreiras. Este curso escolar, máis de 750 estudantes de colexios de Ourense, Pontevedra e Santiago, participaron no programa, dos cales preto de 400 son alumnas. 

Esta semana, Viaqua organizou no Colexio Luis Vives de Ourense un acto para recoñecer a implicación no programa do centro, o equipo docente e o alumnado, coa entrega de galardóns a aqueles que sobresaíron neste curso 2023-24. Un acto híbrido, con conexión online co resto de colexios participantes e presenzal no colexio premiado. 

O C.P.R. Plurilingüe Luis Vives de Ourense foi recoñecido como o Centro “máis influencer” por ser o centro con maior actividade nas redes sociais para dar visibildiade ao traballo realizado polas súas alumnas no descubrimento das STEM. Entregou o recoñecemento, Ana Tejeiro, xerente de Viaqua e a concelleira de Educación do Concello de Ourense, Tamara Silva. Fixeron recepción do mesmo, a directora, Iria Vence, e as alumnas Laia Vázquez de 3º e Chloe López de 4º. 

Alumnas e persoal docente expresaron a súa gran satisfacción co programa Aquae STEM. As estudantes destacaron o divertido que resulta para elas aprender e resolver retos prácticos, traballando en equipo e elaborando construccións e experimentos coas súas propias mans. Os docentes consideraron a calidade da proposta académica do programa Aquae STEM e a capacidade que ten de entroncar os contidos curriculares, ofrecendo a oportunidade de ampliar a ensinanza dende novas perspectivas e con formatos atractivos. 

Para pechar o acto, o presidente e patrón delegado de Fundación Aquae e director de Acción Social do grupo Agbar, ao que pertence Viaqua, Felipe Campos, felicitou ás alumnas polo seu traballo e dedicación. “Aplaudimos o voso traballo, a vosa creatividade e entusiamos por estas disciplinas STEM. Non esquezades nunca que o voso potencial é ilimitado; seguide adiante con valentía, curiosidade, determinación, porque o mundo precisa de vós e da vosa contribución. O futuro é voso”, afirmou. 

Os valores de Aquae STEM 

O programa Aquae STEM fomenta o interese pola ciencia, concienciación ambiental, desenvolve múltiples competencias e contribúe a un futuro en que a fenda de xénero sexa cada vez menor nas diferentes disciplinas científicas e tecnolóxicas. 

Ano tras ano, os resultados das enquisas de satisfacción realizadas a centros e alumnas participantes no programa Aquae STEM demostran o valor achegado polo seu método activo, práctico e inclusivo, que converte ás estudantes nas protagonistas e proporciónalles situacións de aprendizaxe atractivas, impulsando a súa confianza nas súas capacidades científico-tecnolóxicas. 

Este ano, ademais, seguiuse reforzando a idea de visibilizar a referentes femininas nas STEM. Deste xeito, ao longo do curso 2023-2024, as participantes puideron coñecer de primeira man, vía webinario, o traballo da meteoróloga do programa de RTVE Aquí la Tierra Isabel Moreno; a experta en Ciencia Ficción Gisela Baños; a matemática que traballa xunto á NASA na exploración de Marte  Ariadna Farrés; e a experta en Intelixencia Artificial Nerea Luis.